Gruevski para Gjykatës: Nuk jam fajtor për rastin “TNT”

Kështu deklaroi ish kryeministri, Nikolla Gruevski, pas marrjes në pyetje në Gjykatën Penale si i dyshuar në rastin e PSP-së “TNT” për rrënimin e kompleksit “Kosmos”.

Sipas liderit të VMRO-DPMNE-së, Nikolla Gruevski, nga të gjitha ndodhitë e deritanishme del në pah se Prokuroria Speciale Publike është nën kontroll të liderit opozitar, Zoran Zaev, dhe vetëm po zbaton porositë që i jep ai.

“Shihet se PSP bën hapa të porositura nga personi i cili disa herë ka deklaruar se nuk i njeh gjykatat e Maqedonisë. Me siguri është dëshira e tij që të largohem nga shteti dhe mos të kthehem më, por kjo as që është e vërtetë e as që planifikoj ta bëj. Jetojmë në një periudhë në të cilën personi i cili deklaroi disa herë se nuk i njeh gjykatat e vendit është i vetëdijshëm për rejtingun që ka dhe për atë që s’ka mbështetje nga qytetarët, është i vetëdijshëm se afrohen zgjedhjet dhe nuk do të mund t’i prolongojë edhe gjatë kohë, prandaj  përmes kontrollit që ka tek personat e PSP-së mundohet që të relativizojë punët. Tenton që përmes ftesave absurde nga Gjykata, mua dhe bashkëpunëtorët e mi të na paraqesë të ngjashëm ose të njëjtë sikur ai.”- deklaroi  ish kryeministri, Nikolla Gruevski.

Përveç ish-kryeministrit Gruevski, në Gjykatën Themelore ka ardhur edhe kryetari i Komunës së Gazi Babës, Toni Trajkovski, i dyshuar për veprën e njëjtë “TNT”.

Prokurorja Janeva për Nikolla Gruevski, Toni Trajkovksin dhe Mile Janakievskin nuk kërkon paraburgim, por masa të kujdesit. (Sanije Duraku, TVM2)