Orlando–ShBA, aligatori rrëmben fëmijën në një resort luksoz

Pas vrasjes së këngëtares së “The Voice”, Vhristina Grimmie, dhe masakrës së klubit të homoseksualëve, Orlandoja e Floridës bëhet skenë e një tjetër ngjarjeje tronditëse.

Një fëmijë dyvjeçar është rrëmbyer nga një aligator, e ndonëse policia po e kërkon intensivisht, shpresat e gjetjes së tij janë të pakta.

Fëmija ishte duke qëndruar në bregun e lagunës “Shtatë detrat”, kur zvarraniku e ka sulmuar dhe e ka tërhequr në ujë.

Babai i djalit ka hyrë në lagunë e është përpjekur t’ia shkulë të birin aligatorit, por pa sukses. Me dhjetëra policë dhe ekspertë të jetës së egër janë angazhuar në kërkimin e të miturit.

Familja me tre fëmijë nga Nebraska po pushonte në brigjet e lagunës, kur ndodhi ngjarja e rëndë.

Vendi ku ata ndodheshin, “The Grand Floridian”, është një resort luksi në pronësi të “Disney”-t, e cila ndodhet shumë pranë parkut të këtij të fundit në zonë.

Një zëdhënëse e kompanisë tha se drejtuesit e saj janë të “shkatërruar” nga incidenti.

22 persona janë vrarë nga aligatorët në Florida që prej vitit 1948.

GAZMEND KURTISHI