BDI vazhdon me moton “Jo president të njëanshëm”

“BDI  nuk  kërkon hisen e dikujt, por  kërkon  hisen e shqiptarëve që i takon shekuj me radhë. Presidenti i shtetit nuk mund të zgjidhet vetëm nga një popull, por ai duhet zgjedhur  dhe nga etnitetet  tjera”, tha kreu i BDI-së, Ali Ahmeti, në vazhdim të fushatës me moton “Jo presidentit të njëanshëm”.

 

Ahmeti u bëri thirrje shqiptarëve që të mos votojnë kandidatët për president aktual, sepse ata nuk e përfaqësojnë zërin e shqiptarëve. 

 

“Nuk do bëjmë asnjë zmbrapsje deri në realizimit të plotë. Shteti nuk është dedikuar vetëm për njërën palë, përkundrazi, unë po të isha në vend të tyre me kënaqësi do e prisja një ide të tillë, sepse të garosh dhe të drejtosh me funksione të larta të shtetit, është përgjegjësi dhe a ka më mirë  për Maqedoninë dhe ardhmërinë  e Maqedonisë që edhe shqiptarët  të marrin përgjegjësinë dhe drejtimin e institucioneve të larta të shtetit, siç janë president, kryeministër, kryetar parlamenti”, deklaroi kryetari i BDI-së, Ali Ahmeti.

 

Në tubimin e BDI-së në Dibër, fjalim mbajtën edhe funksionarë të tjerë të lartë të BDI-së, si: Gëzim Ostreni, Musa Xhaferi, kryetari i komunës së Dibrës Ruzhdi Lata dhe Argëtim Fida. (Rexhep Qamili, TVM2)