Tiranë, vidhen 1 milionë euro në mes të ditës, policia: S’është faji ynë, por i firmës së sigurisë

Firma koncesionare, e cila merret me sigurinë e këtij aeroporti, nuk ka vepruar edhe pse policia e ka njoftuar herë pas here për mangësitë, çka ka sjellë edhe grabitjen spektakolare, pikërisht aty ku supozohet se niveli i sigurisë është mjaft i lartë. 

“Policia e shtetit është e angazhuar për të garantuar siguri maksimale të qytetarëve në Aeroportin e Rinasit, ashtu siç do të kërkojë në vazhdimësi shtimin e masave të sigurisë nga të gjithë institucionet që kanë përgjegjësi për garantimin e sigurisë brenda aeroportit dhe çdo mjedisi tjetër”,- deklaroi Policia e Tiranës, Ervin Hodaj.

Kreu i grupit parlamentar demokrat, Edi Paloka, e cilësoi grabitjen e djeshme si dëshmi të rrënimit të sigurisë në Shqipëri.

“Pa bashkëpunimin e një shefi të madh asnjë grabitës nuk do të mund të bënte atë që ndodhi dje. Gjendja është katastrofike. Në kohën kur alarmi për terrorizmin është në kulmin e vet dhe kur të gjithë shtetet kanë marrë masa mbrojtëse, në kontrast të plotë në vendin tonë ka rënë çdo standard i sigurisë. Është e kotë që dikush nga klani Rama-Tahiri të mbajë përgjegjësi për ngjarjen, pasi kjo dyshe është zhveshur tashmë nga çdo normë e ndërgjegje morale”,- tha kryetari i Grupit parlamentar demokrat, Edi Paloka. 

Tre grabitësit kanë mundur të marrin rreth 1 milionë euro në mes të ditës, të armatosur dhe të veshur me uniformën e firmës koncesionare që ruan mjediset e aeroportit. Deri tani janë shoqëruar dhjetëra persona, por asnjë nuk është i arrestuar. (Luljeta Ndoka, TVM2)