Sulmi në Irak, rritet numri i viktimave, shpallen tre ditë zie
Numri i të vdekurve nga sulmet vetëvrasëse të së shtunës në Bagdad ka shkuar në 213, raportojnë agjencitë e huaja te lajmeve...
Midis viktimave janë 25 fëmijë dhe 20 gra. Iraku i ka filluar tre ditët e zisë pas sulmit me bombë.
Njoftimi për ditët e zisë erdhi nga vetë kryeministri irakian, Haidar al Abadi, pas vizitës qe ia ka bërë vendit ku ka ndodhur sulmi.
Ai gjithashtu i ka urdhëruar zyrtarët që ta hetojnë në tërësi incidentin për t’u siguruar që të gjithë personat përgjegjës për sulmin të dënohen.
Përgjegjësinë për sulmin e djeshëm me veturë bombë në qarkun Karrada e ka marrë grupi terrorist, “Shteti Islamik”.
Një pjesëtar i Forcave irakiane të sigurisë i cituar nga AFP ka thënë se duhen disa ditë për të nxjerrë të gjithë trupat e pajetë nga vendi ku është kryer sulmi.
Një bombë tjetër është shpërthyer ditën e djeshme në zonën veriore të Bagdadit, duke vrarë pesë persona të tjerë.
Shtëpia e Bardhë i ka dënuar sulmet, duke thënë se ato vetëm sa e forcojnë përkushtimin amerikan për ta luftuar ISIS-in.