Ligji i mediave konfronton opozitën dhe pushtetin

Sipas LSDM-së opozitare, ky propozim ligj nuk është pjesë e marrëveshjes mes partive politike dhe cenon rëndë pavarësinë e mediave. 

 

“Unë vlerësoj se kjo nuk është produkt i ndonjë marrëveshjeje ose bisedimesh, por është vendim i njëanshëm i partisë në pushtet, e cila mundohet edhe më tutje t’i mbajë peng mediat. Më fjalë të tjera, me para të qytetarëve të financohen fushata reklamuese. Sikur mediat në politikën e tyre redaktuese nuk dinë se çdo të thotë interes i qytetarëve për informim të drejtë dhe objektiv”,- deklaroi Tomisllav Tuntev nga LSDM. 

 

Nga VMRO-DPMNE presin që propozimi të hapë debat të gjerë dhe përmes debatit të sillet një vendim cilësor. 

 

“Ky është ligj si pjesë e reformave urgjente prioritare. E kaluam në qeveri dhe presim që të ketë debat të gjerë për këtë. Sa jam unë i informuar, bëhet fjalë për ligj që në mënyrë të detajuar rregullon çështjen që deri tani nuk ka qenë e rregulluar në Maqedoni dhe presim që përmes debatit të dalë një vendim ligjor cilësor që do të pranohet në parlament”,- tha Nikolla Todorov nga VMDO-DPMNE.

 

Propozim ligji në fjalë ka hyrë në procedurë parlamentare dhe pritet të shqyrtohet, edhe pse opozita vazhdon bojkotin e saj.

 

Në propozim parashihet që nga buxheti i shtetit të ndahen mbi 100 mijë euro, duke mos precizuar shumën.

 

Prej tyre, më së paku 75% do të jenë të parapara për televizionet dhe radiot, kurse pjesa tjetër, varësisht nevojës së fushatës, për mediat e shkruara dhe ato elektronike.