BE: Turqia të refuzojë dënimin me vdekje, kushtëzon anëtarësimin

Shtetet anëtare të Bashkimit Europian i kanë bërë thirrje autoriteteve turke, duke përfshirë policinë dhe forcat e sigurisë, që të tregohen më të përgjegjshëm pas tentativës së dështuar të grushtit të shtetit.

“Duhet të shmanget dhuna e mëtejshme për të mbrojtur jetën e njerëzve dhe për të rivendosur qetësinë”,- kanë thënë ministrat e Jashtëm të BE në një deklaratë pas takimit të hënën në Bruksel.

“BE-ja bën thirrje për respektimin e plotë të rendit kushtetues të Turqisë dhe thekson rëndësinë e sundimit të ligjit mbizotërues”, -thanë ministrat duke theksuar se “është shumë e rëndësishme për të siguruar respektimin e plotë të të gjitha institucioneve demokratike të vendit, duke përfshirë qeverinë e zgjedhur dhe Asamblenë e Madhe Kombëtare të Turqisë”.

Ata shtuan se refuzimi  i dënimit me vdekje është një element thelbësor i kushteve të bllokut për anëtarësim. Presidenti, Rexhep Tajip Erdogan, ka thënë se Turqia mund të rikthejë dënimin me vdekje, që u hoq në vitin 2004.

Turqia, tashmë anëtare e NATO-s, aspiron të bashkohet me BE-në.