Lëvizja “Besa”: “suksesi” i qeverisë, mungesa e ujit për shqiptarët

Lëvizja “Besa” akuzon Qeverinë se po diskriminon shqiptarët, duke lënë pa gjënë më të domosdoshme, ujin për pije. Edhe atje ku ka ujë, cilësia e tij është e dyshimtë, thonë nga “Besa”.

 

Shqiptarët janë pa sisteme ujësjellësi, pa kanalizime, pa infrastrukturë, e në një situatë të tillë duket luks të flasësh për projekte kulturore, thonë nga kjo lëvizje. 

 

“Nga fshati Llojan deri në fshatin Nikushtak të Komunës së Likovës, gati të gjitha vendbanimet e Komunës së Zhelinës, fshati Nerasht – Komuna e Tearcës, Komuna e Vrapçishtit, fshatrat Cernilishtë dhe Desovë të Komunës së Dollnenit, fshati Rramanli – Kumanovë, Komuna e Haraçinës... Përveç kësaj, problem më vete është infrastruktura e vjetruar, në të cilën nuk është bërë asnjë investim që nga koha e ish-Jugosllavisë, siç janë vendbanimet e Çairit, të Studeniçanit e shumë të tjera. Ky është “suksesi” i këtij pushteti, kjo është gjendja në të cilën i ka lënë vendbanimet shqiptare ky pushtet”,- deklaroi Nasuf Rushiti nga Lëvizja “Besa”.

 

Nga “Besa” akuzuan se në shumë vendbanime shqiptare investimi i fundit daton që nga ish-Jugosllavia.