“Meranti” godet Tajvanin, mijëra të evakuuar, supertajfuni i drejtohet Kinës

Tajvani dhe Kina kanë shpallur gjendjen e gatishmërisë së lartë, ndërsa stuhia epike po godet ishullin me erëra deri në 370km/h si dhe reshje të dendura. Shkollat dhe institucione në jug të Tajvanit janë mbyllur dhe dhjetëra fluturime janë anuluar. 

 

"Gjatë tornadove më të mëdha në të shkuarën kemi pësuar dëme në skele dhe në shtylla të tabelave rrugore. Por, të shkulet e gjithë shtylla me tabelë rrugore dhe mos të gjendet askund, është gjë me të vërtetë shumë e frikshme. Duken qartë valët të cilat godasin murin e portit, që gjithashtu shkaktojnë frikë. Asnjëherë më parë nuk kemi parë valë kaq të mëdha të shkaktuara nga ndonjë tajfun”,- deklaroi komisioneri i qarkut, Huang Chien-Ting.

 

Fatmirësisht, nuk raportohet për viktima në Tajvan. Katër persona kanë mbetur të plagosur, ndërsa rreth 4 000 policë dhe ushtarë janë dislokuar në zonat e prekura më rëndë për evakuime të ardhshme që mund të nevojiten. Megjithatë, autoritetet tajvaneze u shprehën se janë marrë masat e duhura dhe nuk pritet shkatërrim apo dëme masive.