Bisedimet e Brexit - Renzi paralajmëron Britaninë për negociata të vështira

Ai madje ka shkuar më tej, duke u shprehur se Londra do të ketë vështirësi të përfitojë më shumë të drejta se vendet e tjera që ndodhen jashtë Bashkimit Europian. Renzi akuzoi gjithashtu ish-Kryeministrin Cameron se ka përdorur referendumin për të zgjidhur problemet e brendshme në Partinë e tij Konservatore.

 

Do të jetë e pamundur që Britania e Madhe të marrë gjatë bisedimeve të daljes më shumë të drejta se vendet e tjera që tashmë janë jashtë Bashkimit Europian.

 

Kështu ka deklaruar kryeministri italian, Mateo Renzi, i cili ka paralajmëruar se bisedimet do të jenë shumë të vështira, por sipas tij gjithçka do të marrë zgjidhje vetëm pasi Britania të nisë proçedurat e daljes.

 

I pyetur nëse mund të ketë fleksibilitet mbi rregullat e Bashkimit Europian dhe akses në tregun e përbashkët, Kryeministri italian tha se ky është një debat interesant, sepse ky debat do të jetë mbi konceptin e rregullave të BE-së.

 

 

Kryeministri italian tha se diskutimet do të mbahen nga Komisioni Europian dhe jo individualisht nga lideret e vendeve europiane.

 

Gjithësesi ai ka shprehur gatishmërinë për të punuar me homologen e tij britanike Teresa May dhe për ta mbështetur atë në këtë proçes të vështirë.

 

Renzi gjithashtu ka fajësuar ish-kryeministrin britanik David Cameron, i cili sipas tij tentoi të zgjidhë problemet e brendshme të Partisë së tij Konservatore nëpërmjet referendumit.

 

Kryeministri italian ka vendosur mbajtjen e një referendumi në Itali me qëllim ristrukturimin e sistemit parlamentar.

 

Në kohën kur njoftoi lajmin ai deklaroi: “Kur David Cameron vendosi të mbajë një referendum për të zgjidhur problemet e tij të brendshme në parti, ishtë një problem. Ne nuk mund të përdorim punët e jashtme për të zgjidhur problemet e brendshme”.