Varrimi i Shimon Peres, liderët botërorë në Izrael, mes tyre edhe Abas

Një ceremoni shtetërore u mbajt në nder të ish-kryeministrit dhe ish-presidentit pranë varrezave kombëtare të Jeruzalemit, ku edhe do të prehet pranë shumë liderëve të tjerë izraelitë.

 

Mes të ftuarve ishin figura të rëndësishme të skenës globale, si presidenti amerikan, Barack Obama, kancelarja, Angela Merkel, kreu i Elizesë, François Hollande, sekretari i përgjithshëm i OKB-së, Ban Ki Mun, por gjithashtu edhe lideri i autoritetit palestinez, Mahmud Abas, i cili vizitoi për herë të parë Izraelin që prej vitit 2010.

 

Jordania dhe Egjipti, dy shtetet e vetme arabe që kanë nënshkruar marrëveshje paqeje me Izraelin, dërguan përfaqësues për të marrë pjesë në ceremoni. 8 mijë efektivë janë mobilizuar për të garantuar sigurinë për mijëra pjesëmarrësit në funeral.

 

Një operacion i madh sigurie, i cilësuar si i paprecedentë nga shefi i policisë, ka çuar në arrestimin e disa personave në prag të ceremonisë. Kjo është ngjarja më e madhe e këtij lloji në Izrael, që prej ceremonisë mortore të kryeministrit, Yitzhak Rabin, i cili u vra nga një nacionalist hebre në vitin 1995. 

 

Shimon Peres pësoi një goditje ishemike dy javë më parë dhe humbi jetën të mërkurën në një spital të Tel Avivit. Si një negociator për Organizatën e Çlirimit të Palestinës, ai ishte një prej nënshkruesve të marrëveshjeve të Oslos në vitin 1993, për çka u vlerësua edhe me çmimin Nobel për paqen një vit më vonë.