Tetovë, nesër fillon Festivali i filmit Tiff-Oda

36 filma të metrazhit të shkurtër nga 25 shtete të ndryshme, do të prezantohen ditëve në vijim, në kuadër të Festivalit të filmit Tiff- Oda në Tetovë.

Ky është edicioni i pestë me radhë i këtij festivali që organizohet në qytetin e Tetovës.

Organizatorët thonë se festivali fillon nesër, ndërsa vlerësojnë se ai po shkon duke u rritur vit pas viti.

“Kryesisht festivali Tif –Oda është një festival që në ngjarjen e vetë e ka filmin e shkurtër, filmin artistik të metrazhit të shkurtër. Më herët foli edhe profesor Spahiu, ku ka pasur një konkurrim diku të rreth 855 filma, nga të cilët janë selektuar vetëm 36-të që prezantojnë 25 shtete. Ky është program kryesor, ndërsa programet tjera i kemi, edhe punëtoritë, edhe bisedë me autorët dhe programin e mbrëmjes që kryesisht e kemi ndërtuar vetëm me qytetarët, në të cilin bëjnë filma, ku kanë triumfuar edhe në festival shumë të mëdha, siç është filmi “Shok”, filmi “Krom” dhe “Babai””,- deklaroi organizatori, Sabedin Selmani.

“Në përbërjen e këtij festivali janë tema të caktuara që janë përzgjedhur nga një trup i përbërë nga studentë dhe profesionalistë të një seleksionimi të brendshëm. 800 e disa filma të aplikuar janë bërë një numër shumë simpatik, janë bërë 36 filma të shkurtër. Natyrisht në këtë tërësi përbërja është e shteteve që i kemi në regjion dhe njëkohësisht edhe ato më gjerë”,- deklaroi organizatori, Afrim Spahiu.

Festivali Tiff-Oda do të përmbyllët më 8 tetor. Por, megjithëse organizimin e festivalit e ka përkrahur komuna e Tetovës, Qendra për kulturë në Tetovë, Universiteti i Tetovës dhe Agjencia e filmit në Maqedoni.

Organizatorët thonë se përkrahja është e pamjaftueshme për realizimin e gjithë asaj që e kanë paramenduar. (Visar Sadiki, TVM2)