Dita botërore për punë të dinjitetshme, në Maqedoni shumë punonjës janë honoraristë

Në Maqedoni shumë punëtorë kanë status të parregulluar. Ekspertët nga fusha të ndryshme thonë se një numër i madh i personave punojnë me honorar pa sigurim shëndetësor, me paga të ulta dhe jo të regullta, si dhe pa regjistrim të stazhit.

“Ne jemi në një nga ato profesionet e ralla që duhet të sigurojmë mjetet për punë, edhe atë duke i sjellë nga shtëpia. Në institucionet arsimore ka shumë asistentë, të cilët paguhen me një shumë të vogël dhe ata nuk figurojnë askund. Si është e mundur që një profesor 45 vjeçar nuk ka asnjë ditë stazh pune”,- deklaroi profesoresha, Maja Stevanovski.

“Gazetarët në Maqedoni janë e vetmja kategori që nuk i posedon të drejtat autoriale në pjesët e tyre. Unë personalisht paguhem vetëm për tekstin që publikohet, por ka raste që teksti im merret nga ndonjë gazetë tjetër nga ana e redaksisë pa më pyetur mua fare”,- tha gazetari, Zvezdan Georgievski.

“Lufta më e madhe e punonjësve seksualë është pikërisht që puna e tyre të pranohet. Ata nuk pranohen si punëtorë në sindikatat e organizuara. Ju thuhet se puna e tyre nuk është kategori që mund të përfitojë të drejta si punëtorët e tjerë. Nuk ju paguhen kontributet, dhe kur të penzionohen nuk do të kenë sigurim shëndetësor”,- theksoi Irena Cvetkoviq.

Në tribunën e organizuar nga Fondacioni “Fredrih Ebert” u theksua se puna dinjitoze siguron të ardhura për përparim ekonomik, por fatkeqësisht ka raste kur kjo kategori e punëtorëve keqpërdoret. (Rejhane Bushi-Metaj, TVM2)