Afganistan, rrëzohet helikopteri, vdesin shtatë persona ushtarak

Zyrtarët afganë thonë se nga rrëzimi i një helikopteri të ushtrisë në provincën veriore, Baghlan, janë vrarë së paku 7 persona që ishin në të.

Ministria e Mbrojtjes e Afganistanit tha se rrëzimi i djeshëm ishte shkaktuar nga një problem teknik në helikopterin e prodhimit rus, të tipit Mi-17. Por, grupi taliban ka pretenduar se helikopterin e kanë rrëzuar luftëtarët e vet.

Zyrtarët thanë se përplasja ka ndodhur derisa helikopteri ishte në mision të furnizimit të një baze ushtarake në Qorgan Tepa, e cila ishte rrethuar nga militantët për gati një javë, ndërsa brenda bazës ishin së paku 100 ushtarë afganë.

Muajve të fundit, militantët talibanë i kanë shtuar sulmet e tyre kundër forcave të sigurisë në Baghlan dhe provincën e afërt, Kunduz.

Në Kunduz, forcat afgane vazhdojnë të luftojnë kundër militantëve talibanë shtatë ditë pasi ata depërtuan në qytet.