Dita e Kryengritjes Antifashiste, lufta për liri, ideali që bashkoi të gjithë qytetarët

Presidenti Ivanov ka përkujtuar se Maqedonia në çdo kohë ka gjetur forcë të mbijetojë ndarjet e të bashkohet për një qëllim më të madh rreth idesë për një shtet të lirë.

 

“Nëse ekziston një ide që si pishtar na ka udhëhequr nëpër stuhitë e historisë, ajo është ideja për liri të Maqedonisë. Falë asaj ideje, ne kemi gjetur forca të pajtohemi dhe t’i tejkalojmë ndarjet”. 

 

Edhe kryeministri Dimitriev ka përkujtuar në urimin e tij guximin e njerëzve që sakrifikuan gjithçka për ëndrrën e lirisë.

 

Sot kujtojmë shumë luftëtarë të cilët atëherë kur ishte nevoja dolën para sfidës së gjeneratës së tyre dhe me guxim e zhvilluan luftën e cila kontribuoi që Maqedonia ta presë fundin e Luftës së Dytë Botërore në anën e fitimtarëve, në anën e koalicionit të madh të vendeve ithtare të paqes, lirisë, demokracisë dhe respektimit të të drejtave të njeriut”,- qëndron në urimin e Dimitrievit. 

 

110 mijë njerëz morën pjesë në luftën kundër fashizmit, mes tyre edhe shumë shqiptarë që luftuan për idealin e madh, për të qenë të barabartë në një shtet që e shikonin edhe si të tyrin. 58 mijë njerëz u internuan, ekonomia e vendit u shkatërrua pothuajse tërësisht.

 

Maqedonia u rimëkëmb ndër vitet që pasuan, madje fitoi edhe pavarësinë në 1991. Por, idealet partizane nuk u realizuan për ata partizanë shqiptarë që besuan se liria dhe barazia që proklamohej duhet ta bënte ëndrrën e lirisë të njëjtë e të bukur për të gjithë. Për të fituar barazinë u desh edhe një luftë tjetër, madje edhe shumë përpjekje të përditshme që vazhdojnë edhe pas vitit 2001.