Aksident në autostradën Tiranë-Durrës, vdesin katër të rinj, njëri mjet ecte në krahun e kundërt

Dy automjete janë përplasur kokë më kokë pranë Sukthit, ndërsa viktimat janë tre vajza dhe një djalë. Tre vajzat që humbën jetën ishin shoqe dhe udhëtonin në të njëjtin mjet.

 

Viktimat e këtij aksidenti janë Greta Sherifi nga Saranda, 23 vjeçe, e cila drejtonte njërin nga mjetet tip “Benz” dhe dy shoqet e saj që ndodheshin në makinë me të, Izabela Balla, 33 vjeçe dhe Elona Xhuti, 34 vjeçe, banuese në Tiranë.

 

Nga aksidenti mbeti i vdekur edhe Dashnor Delialliasi, 36-vjeç, nga Durrësi, që drejtonte mjetin tjetër tip benz. Sipas policisë, shkak për këtë aksident është bërë hyrja në sensin e gabuar të mjetit me drejtues Dashnor Delialliasi, shpejtësia e madhe me të cilën ka qenë duke udhëtuar, me mbi 150 km/orë dhe mungesa e ndriçimit.

 

Mësohet se 36-vjeçari ka udhëtuar në kahun e kundërt të rrugës që nga Ura e Dajlanit dhe ka udhëtuar për mbi 15 km në sens të gabuar. Ndriçimi në vendin ku ndodhi aksidenti nuk ishte funksional dhe neonet ishin të fikura.

 

Pavarësisht se pranohet mungesa e ndriçimit, ekspertët thonë se aksidenti erdhi nga një gabim njerëzor. Për nxjerrjen e trupave është përdorur ndriçimi i automjeteve.