Integrimi euroatlantik, autoritetet: Reformat janë prioriteti ynë

Maqedonia duhet të vazhdojë me reforma në të gjitha fushat me të vetmin qëllim, që të jenë sa më afër Bashkimit Europian dhe NATO-s.

Ambasadori norvegjez porositi autoritetet të ndërtojnë struktura qeveritare të gatshme për të vazhduar procesin e negociatave. Autoritetet premtojnë se reformat mbeten prioritet për vendin.

“Ne duam ta përkrahim Maqedoninë në përpjekjet e saj në hyrjen e organizatave ndërkombëtare. Një ndër kushtet kryesore është që të ndërtohet mirë struktura qeveritare dhe të vazhdoni në procesin e negociatave”,- tha  ambasadori i Norvegjisë në RM, Arne  Sannes Bjornstad.

“Maqedonia, që nga pavarësia ka angazhim strategjik anëtarësimin në BE. Gjatë kohë jemi në procesin e anëtarësimit dhe janë miratuar reforma të shumta, por jemi të vetëdijshëm se para nesh qëndrojnë edhe shumë sfida”,- tha zv.kryeministri, Arber Ademi.

Një nga sfidat është edhe përballja me krizën e refugjatëve. Kriza nuk përballohet e vetme, por përmes bashkëpunimit dhe progresi në procesin e integrimit do të kontribuojë në përforcimin e stabilitetit rajonal.

“Maqedonia ishte një nga rrugët kryesore transitore. Çdo ditë në Ballkan kanë  kaluar mijëra migrantë, por Europa e kuptoi se është e pamundur që kriza të përfundojë me zgjidhje të pjesshme. Pavarësisht madhësisë dhe gatishmërisë institucionale të një shteti, i vetëm ai nuk ka asnjë mundësi të përballet me krizën e  refugjatëve, sepse numri ishte tejet i madh”,- tha ministri i Punëve të  Brendshme, Oliver Spasovski.

“Progresi në procesin e integrimit në NATO dhe BE do të kontribuojë në përforcimin e stabilitetit jo vetëm në Maqedoni, por edhe në rajon dhe më gjerë”,- tha ministri i Mbrojtjes, Zoran Jolevski.

Projekti i financuar nga Mbretëria norvegjeze siguroi trajnime të specializuara për më shumë se 300 nëpunës shtetërorë nga më shumë se 30 institucione, ndërkaq sot u dhanë certifikata për 180 kandidatët më të suksesshëm. (Rejhane Bushi-Metaj, TVM2)