Kuvend, seancë për buxhetin dhe zhbërjen e Kuvendit

Nismën për shpërndarjen e Kuvendit e dha LSDM, VMRO-DPMNE e pranoi me kusht që paraprakisht të miratohet buxheti i vitit 2017.

 

Para fillimit të seancës së sotme parlamentare, koordinatorët e të gjitha partive politike parlamentare për rrjedhën e Kuvendit mbajnë takim konsultues me kreun e Kuvendit, Trajko Veljanovskin, për t’u dakorduar për rrjedhën e itinerarit të seancës parlamentare.

 

Nëse deputetët në seancën e sotme miratojnë propozim-buxhetin për vitin 2017 me procedurë të shkurtër, atëherë në rend të ditës pritet të jetë edhe ligji për statusin e PSP-së si dhe propozimi për shpërbërjen e Kuvendit.

 

Socialdemokratët thonë se shpërbërja e parlamentit po ndodh në përputhje me Marrëveshjen e Përzhinës dhe është në interes të zgjidhjes së krizës politike dhe se tashmë kanë filluar afatet ligjore për shpalljen e zgjedhjeve.  

 

Nga ana tjetër, sipas LD-së, me shpërndarjen e Parlamentit do të krijohen mundësi kushtetuese që zgjedhjet të mbahen më 11 dhjetor të këtij viti. VMRO-DPMNE-ja në pushtet mbështetjen për shpërndarjen e Kuvendit e kushtëzoi me miratimin paraprak të buxhetit për vitin 2017.

 

Sipas partisë, me sjelljen e buxhetit do të sigurohet garanci për pagesën e rregullt të pagave, pensioneve, asistencës sociale dhe shlyerjes së nevojave të tjera të qytetarëve.

 

Në koordinimin e grupeve të deputetëve pritet të flitet edhe për Njësinë e gjashtë zgjedhore, e cila ka më shumë votues nga numri i lejuar.

 

Eurokomisari për negociata për zgjerim dhe politikë fqinje, Johanes Han, pas takimeve të tij të premten në Shkup me liderët e katër partive më të mëdha porositi që të zgjidhet kjo çështje, me qëllim që të mos lihet hapësirë për kritikë në zgjedhje.

 

Grupi i punës i formuar prej katër partive më të mëdha në Parlament nuk gjeti zgjidhje për këtë çështje.