Kuvend, dështon iniciativa e PDSh-së për njësitë zgjedhore

Me 83 vota kundër dhe 20 për, Kuvendi ka dështuar edhe në një përpjekje, kësaj radhe me iniciativë të grupit parlamentar të PDSh-së për të ndërhyrë në Kodin Zgjedhor për sa i përket pabarazisë së numrit të votuesve nëpër njësitë zgjedhore të parashikuar me ligj prej +-5%.

 

Imer Aliu nga PDSh sqaroi se me këtë numër më të madh votuesish që ka njësia e gjashtë zgjedhore në raport me njësitë tre dhe katër, dëmtohen votuesit shqiptarë.  

 

“Ne kërkojmë që ky parlament t’i miratojë këto ndryshime që ne i propozojmë me të vetmin qëllim, që të ndreqet një padrejtësi që u bëhet shqiptarëve me atë që vota e shqiptarëve vlen më pak se një votë e maqedonasit. Është shumë e thjeshtë, njësia zgjedhore numër 6 ka mbi 30 mijë votues më shumë se mesatarja e njësive tjera zgjedhore, kurse p. sh. njësia zgjedhore numër 3 ka diku 25 mijë votues më pak se mesatarja dhe kjo dallimin nuk e bën 5%, por 9.5-9.8%, që janë diku rreth 30 mijë vota që njësia zgjedhore numër 6 i ka në raport me njësitë zgjedhore numër tre dhe katër. Dhe ky numër i votave rritet tej mase. Unë nuk e shoh se si mund të shkohet në zgjedhje pa e rregulluar këtë çështje, e cila është e detyrueshme për të pasur zgjedhje legjitime”,- tha Imer Aliu nga PDSh.

 

VMRO-DPMNE dhe LSDM votuan kundër, ndërsa BDI votoi për propozimin e PDSh-së, por deputeti, Xhevat Ademi, tha se PDSh e kishte të qartë, pasi që paraprakisht nuk kishte konsensus politik mbi këtë propozim. Sipas tij, është mirë që doli në shesh se kush është kundër.

 

“Jo gjithçka në fjalën e propozuesit qëndron, jo gjithçka ka bazë ligjore, por në esencë si fill i kuq qëndron barazia e votës së qytetarit, prandaj grupi parlamentar i BDI-së votoi për, për t’i dëshmuar grupit parlamentar të PDSh-së se nuk jemi ne armiqtë tuaj, nuk jemi ne kundërshtarët tuaj. Armiqtë dhe kundërshtarët i keni te këta që votuan kundër dhe dua që të përcjell edhe një moment që ndodhi sot. E shumëpërfolura filozofi e re që promovon LSDM me ofertë në adresë të votuesve shqiptarë sot u dëshmua në një akt të thjeshtë votimi për një propozim të diskutueshëm”,- tha Xhevat Ademi nga BDI.

 

Aktualisht, njësia e gjashtë zgjedhore ka 5.28 për qind më shumë votues se mesatarja e gjashtë njësive, ndërsa njësia e tretë dhe e katër kanë mbi katër për qind më pak. Me këtë, dallimi mes njësisë së tretë dhe asaj të katërt me njësinë e gjashtë arrin në gati 30 mijë votues.