Specialja hap nesër dy raste të reja, PSP: Prisni pres-konferencën për detaje

Prokuroria Speciale Publike nesër do të publikojë dy raste të reja. Nga PSP nuk kanë dashur të japin detaje se për çfarë lëndësh dhe në pyetjen tonë u përgjigjën shkurt se për hollësi duhet të presim deri nesër në orën 11, për kur dhe është e paraparë pres-konferenca.

Jozyrtarisht, mësojmë se për dy lëndët do të akuzohet një zyrtar aktual dhe një ish-zyrtar i lartë, nga Ministria e Transportit dhe Lidhjeve dhe ajo e  Kulturës, por sa të vërtetë ka në këto pohime jozyrtare do të mësohet nesër.

Tashmë dihet që hetuesit e PSP-së kanë konfiskuar dokumentacionin  nga Ministria e Kulturës për projektin “Shkupi 2014”, projekt ky që zinte një vend të rëndësishëm në të ashtuquajturat “bomba” të publikuara nga opozita. As nga Ministria e Kulturës nuk deshën të prononcohen, por për përgjigje na drejtuan tek PSP.

“Proceduarat që udhëhiqen nga Prokuroria Speciale janë të fshehta  dhe Ministria e Kulturës nuk mund të japë deklarata apo t’i komentojë të njëjtat. Për të gjitha informacionet, ju udhëzojmë t’i drejtoheni Prokurorisë Speciale si institucion kompetent për këtë çështje”,- na thanë nga Ministria e Kulturës.

Përveç “Shkupit 2014”, mediat spekulojnë se nesër do të hapet edhe lënda për projektin “Qyteti i diellit”, respektivisht tentimi i dështuar i investitorëve izraelitë për ta realizuar atë në komunën e Sopishtës.

Leja për ndërtim aktualisht u është dhënë investuesve nga Turqia, por hetimi i PSP-së do të bazohet në mënyrën se si e fituan të drejtën për ndërtim investuesit e parë, që më pas u tërhoqën nga projekti. (Gazmend Rexhepi, TVM2)