Në Alepo të Sirisë nis pauza humanitare

Pauza ka nisur formalisht në orën tetë të mëngjesit, sipas kohës lokale. Ajo ka qenë e paraparë të zgjasë tetë orë, por Moska tha se e ka zgjatur edhe për tri orë të tjera.

 

Forcat qeveritare të Sirisë, të mbështetura nga Rusia, kanë nisur muajin e kaluar një ofensivë në zonat e kontrolluara nga rebelët në Alepo.

 

“Ajo çfarë po ndodh në Alepo është krim lufte”,- ka thënë presidenti i Francës, Francois Hollande, pas bisedimeve me liderët gjermanë dhe rusë në Berlin. 

 

Edhe kancelarja gjermane, Angela Merkel, e ka dënuar fushatën ajrore në qytetin më të madh të Sirisë, duke e cilësuar si “jonjerëzore dhe mizore”.

 

Ajo i përshkroi bisedimet me Putinin për Sirinë si “shumë të vështira”. Të dy udhëheqësit paralajmëruan se nuk do të përjashtojnë vendosjen e sanksioneve ndaj Rusisë, disa orë përpara një samite të Bashkimit Europian, ku roli i Rusisë në Siri është vënë për diskutim. 

 

Rreth 2,700 njerëz janë vrarë prejse ka nisur ofensiva në Alepo.