OKB: Në fuqi marrëveshja për klimën

Marrëveshja globale për ndryshimet klimatike prej sot hynë në fuqi, duke bërë presion ndaj afro 200 vendeve për të filluar zbatimin e planeve për luftimin e emetimit të gazrave të dëmshëm.

“Ky është moment për të festuar”,- tha shefja e Kombeve të Bashkuara për klimë, Patricia Espinosa, dhe ka shtuar se “është, po ashtu, moment për të shikuar përpara me synim të qartë dhe gatishmëri të ripërtërirë për detyrën e ardhshme”.

Me Marrëveshjen e Parisit parashihet lirimi i ekonomisë botërore nga karburantet e fosileve në gjysmën e dytë të këtij shekulli, duke e kufizuar rritjen e temperaturës mesatare botërore nën 2 shkallë celsius.