Tornado në Romë, dy të vdekur dhe dëme të mëdha materiale

Vendi është përfshirë nga shira të fuqishëm, ndërkohë që në Romë është regjistruar edhe një tornado.

 

Erërat e forta dhe reshjet e shiut, që nisën një ditë më parë, kanë shkaktuar deri tani të paktën dy viktima. Sipas raportimeve në qytetin pranë Romës, Ladispoli, si pasojë e motit u shkatërrua një ndërtesë tetëkatëshe, duke lënë një të vdekur dhe disa të plagosur.

 

Ndërkohë, në veri të Romës, në Cessano, tornado shkaktoi vdekjen e një tjetër personi, kur një pemë ra mbi makinën e tij.

 

Era e fuqishme shkaktoi edhe dëme të mëdha materiale, ndërsa detyroi edhe ndërprerjen e transportit hekurudhor.

 

Moti ekstrem do të përfshijë këtë javë edhe një pjesë të Ballkanit, ku janë dhënë paralajmërime për përmbytje masive. 

 

Britania e Madhe, ndërkohë, është mbuluar nga dëbora. Temperaturat janë ulur nën zero pothuajse në të gjithë vendin, ndërsa në disa zona kanë arritur edhe në minus 4 gradë celsius.

 

Këto janë temperatura  më të ulëta se mesatarja e nëntorit. Në shumë rrugë dëbora ka arritur në disa centimetra, duke shkaktuar probleme për qytetarët, pasi disa prej rrugëve janë bllokuar.