Të shtëna në Shkup, një i plagosur. MPB: Rasti është qërim hesapesh

Në këtë incident të armatosur nga dy vetura është gjuajtur me armë zjarri dhe si pasojë e kësaj është plagosur rëndë drejtuesi i veturës “Golf 5”, 45 vjeçari D. T. nga lagja Gjorçe Petrov. 

 

“Informatat e parë  që dispozojmë tregojnë se po bëhet fjalë për një qërim hesapesh, por a bëhet fjalë për qërim hesapesh kriminale apo për qërim hesapesh kriminale-politike ajo do të konfirmohet nga organet policore dhe hulumtimet e MPB-së. Personi në fjalë është i njohur për vepra kriminale në polici”,- deklaroi zëvendësministri plotësues i MBP-së, Oliver Andonov.

 

I plagosuri në mëngjes i është nënshtruar disa ndërhyrjeve kirurgjike dhe sipas mjekëve ai për momentin është jashtë rrezikut për jetë dhe vazhdon të kurohet në Spitalin Shtetëror në Shkup.

 

45 vjeçari edhe vitin e kaluar u sulmua nga disa persona të maskuar dhe të armatosur, por atëherë  D. T. ka arritur në kohë që t’i ikë sulmuesve.