Sulm vetëvrasës në Afganistan, gjashtë persona të vrarë, ISIS merr përgjegjësinë

Përgjegjësinë për këtë sulm, që ka ndodhur sot afër Ministrisë së Mbrojtjes së Afganistanit, e ka marrë një grup i ndërlidhur me ekstremistët e “Shtetit Islamik”.

 

"Një shpërthim i fuqishëm ndodhi këtu, ne nuk dinim se çfarë ndodhi më saktësisht, por zhurma ishte shumë e fuqishme. Menjëherë pas shpërthimit erdhën ambulancat në vendin e ngjarjes dhe policia e bllokoi vendin”,- tha banori, Jahanzeb Khan.

 

"Aty kishte trupa të vdekur dhe të plagosur. Ne i ndihmuam dhe evakuuam viktimat në spitalet aty pranë. Më pas arritën edhe ambulancat si dhe forcat e sigurisë”,- theksoi dëshmitari, Shreen Agha Ahmadzai.

 

Zëdhënësi i Ministrisë së Brendshme, Sediq Sediqi, tha se ndër të vrarët dhe të plagosurit ka pjesëtarë të forcave të sigurisë dhe civilë.

 

Zyrtarët thanë se automobili i takonte Agjencisë së spiunimit të Afganistanit, që është e njohur me emrin Drejtorati Kombëtar i Sigurisë.

 

Presidenti i Afganistanit, Ashraf Ghani, e ka dënuar këtë sulm, duke thënë se “terroristët nuk mund t’i arrijnë qëllimet kryesore duke përhapur frikë”.