LPM akuzon KShZ-në: Kërkon vërtetime se nuk jemi të dënuar

Lëvizja Popullore për Maqedoninë ka akuzuar Komisionin Shtetëror Zgjedhor për keqpërdorim të detyrës zyrtare, pasi ka kërkuar nga parashtruesit e listave të LPM-së që të paraqesin për çdo kandidat vërtetim nga gjykata që nuk ka qenë i dënuar.

 

LPM-së i duket absurd kjo kërkesë që vlen për të gjithë pjesëmarrësit e tjerë në zgjedhje. Ata, madje, akuzojnë KShZ-në se me veprime të tilla rrezikon shtetin ligjor.

 

“Askund nuk është e parashikuar që të dorëzohet dëshmi për çdo kandidat që nuk është i gjykuar penalisht. Jorastësisht në Kodin Zgjedhor nuk ka detyrim të tillë, sepse në nenin 106, paragrafi 5 të Kodit Penal është e shkruar se “askush nuk ka të drejtë të kërkojë nga qytetarët dëshmi se a janë apo nuk janë të gjykuar”. KShZ me atë që kërkon nga kandidatët për deputetët që të dëshmojnë që nuk janë të gjykuar, vë kusht që nuk është i karakterit juridik. Një sjellje e tillë e KShZ-së është shembull klasik për keqpërdorim të pozitës zyrtare dhe çon në shkatërrim të shtetit juridik”,- thonë nga LPM.