Delegacioni i KE-së do të monitorojë zgjedhjet e 11 dhjetorit

Një delegacion i Asamblesë Parlamentare të Këshillit të Evropës (APKE), i përbërë prej gjashtë anëtarëve, ndërsa i udhëhequr nga Stefan Shenah (Austri), do të realizojë vizitë parazgjedhore në Maqedoni më 21 dhe 22 nëntor, që të bëjë vlerësim të fushatës parazgjedhore dhe klimës politike para zgjedhjeve parlamentare të caktuara për më 11 dhjetor, 2016.

Delegacioni i APKE-së, sipas kumtesës së lëshuar nga Strasburgu, pritet të takohet me kryetarin e Kuvendit të Republikës së Maqedonisë dhe ministrin e Punëve të Brendshme.

Bisedimet gjithashtu janë paraparë me përfaqësues të partive politike të cilat marrin pjesë në zgjedhje, kryetari dhe anëtarët e Komisionit Shtetëror Zgjedhor, të Prokurorisë Speciale, si dhe shumë anëtarë të trupit diplomatik dhe përfaqësues të organizatave ndërkombëtare, shoqërisë civile dhe mediave.

APKE zgjedhjet më 11 dhjetor do t’i ndjek me delegacion prej 25 anëtarëve, pas çka do të përpilojë raport, i cili do të prezantohet në hapjen e sesionit parlamentar në janar të viti 2017.

Anëtarët e delegacionit parazgjedhor të APKE-së i përfaqësojnë grupet politike të Asamblesë panevropiane.

Krahas shefit, Stefan Shenah (Austri), gjenden edhe Egdijus Vareikis (Lituani), Krisitna de Pejtor (Itali), Suat Onal (Turqi), Matjazh Hanzel (Slloveni) dhe Valeriu Gileçi (Moldavi), përndryshe raportuesi i APKE-së për post-vëzhgim të dialogut me Republikën e Maqedonisë.