Thellohet bashkëpunimi Francë-Maqedoni për “Natyra 2000”

Në kuadër të bashkëpunimit të krijuar bilateral midis ministrive të ambientit jetësor në të dy vendet, Ministria e Mjedisit Jetësor dhe Planifikimit Hapësinor e Republikës së Maqedonisë në bashkëpunim me Sekretariatin për Çështje Evropiane, Ambasadën franceze dhe Institutin francez në Shkup organizuan seminarin me temën “Shkëmbimi i përvojave midis Francës dhe Maqedonisë për Natyra 2000 dhe implementimi i direktivave për habitatet dhe zogjtë”.

Ministri i Mjedisit Jetësor , Bashkim Ameti, në fjalimin e tij theksoi se një nga politikat dhe instrumentet e BE-së në pjesën e mbrojtjes së natyrës janë direktivat e BE-së për habitatet dhe zogjtë, të cilat nga ana tjetër janë mekanizmat ligjore themelore për krijimin e Rrjetit ekologjik evropian “Natyra 2000”.

“Për këtë arsye “Natyra 2000” e njohim si një segment kyç në funksionimin e ekosistemit, në ruajtjen e pasurive natyrore, specieve bimore dhe shtazore dhe habitatet e tyre natyrore, të cilat janë të një interesi dhe regjimi të posaçëm të mbrojtjes së BE”,- tha Ameti.

Për rëndësinë e këtij bashkëpunimi fjalim të hapjes kishte edhe ambasadori i Francës në Maqedoni, Kristijan Timonie.

Në seminar morën pjesë edhe dy ekspertë francez, zëvendësdrejtoresha rajonale e  Mjedisit Jetësor, Planifikimit dhe Banimit  e Oksitanisë, Lorens Pujo, dhe zëvendësdrejtoresha për Ekologji në Oksitani, zj. Paulla Fernandes.