Franca fton takim urgjent në Këshillin e Sigurimit të OKB-së për Alepon

Franca ka bërë thirrje për një takim urgjent të Këshillit të Sigurimit të Kombeve të Bashkuara për të diskutuar situatën në Alepo.

Ministri i Jashtëm i Francës, Jean-Marc Ayrault, e bëri kërkesën pas intensifikimit të luftimeve në zonë dhe, siç tha, rritjes së katastrofës humanitare. Shefi për çështje humanitare i Kombeve të Bashkuara, Stephen O’Brien, tha sot në Bejrut se mbi 16,000 civilë janë zhvendosur nga luftimet në ditët e fundit.

Forcat qeveritare të Sirisë kanë rikthyer kontrollin e disa qarqeve të rëndësishme në lindje të Alepos. Alepo, prejse ka filluar lufta më 2011, ka qenë bastioni më i fuqishëm i opozitës që kundërshton regjimin e presidentit sirian, Bashar al-Assad.

Rikthimi i kontrollit mbi qytetin do të ishte fitore e madhe për qeverinë, por jo edhe fundi i luftës kundër presidentit sirian, Bashar al-Assad, tha për BBC-në negociatori i lartë i opozitës siriane, George Sabra.