Opozita maqedonase drejt mospranimit të mandateve

Lidhja Social-Demokrate e Maqedonisë në mbledhjen e jashtëzakonshme të Këshillit Ekzekutiv, mbrëmë ka vendosur që të mos i pranojë mandatet e deputetëve.

 

Një vendim të tillë duhet ta verifikojë edhe Këshilli Qendror Partiak. Në kumtesën e kësaj partie thuhet se mbrëmë është vendosur që të mos parashtrojnë vërejtje për parregullsi, për shkak se nuk e njohin rezultatin e zgjedhjeve. 

 

Në të kaluarën, para dhe në ditën e zgjedhjeve, kemi shtruar 170 vërejtje të ndryshme dhe të gjitha ato ose janë refuzuar ose askush për ata nuk ka reaguar”, thuhet në kumtesën e LSDM-së. 

 

Propozimit të LSDM-së për Qeveri teknike dhe dorëzim të mandateve, mbështetje të parezervë i  ka dhënë edhe PRSD-ja e Tito Petkovskit. 

 

 

Por kreu i VMRO-DPMNE-së, Nikolla Gruevski, duke e vlerësuar si të dëmshëm këtë vendim të opozitës, shpreson se LSDM-ja do të ndryshojë qëndrimin. 

 

“Vlerësoj se është një vendim i dëmshëm për Shtetin dhe i dëmshëm për vetë partinë që duhet ta bartë. Partia ende ka kohë deri në formimin e Parlamentit për vendimin”, tha kryeministri Nikolla Gruevski.

 

Ndërsa euroambasadori Aivio Orav, sot nuk ka komentuar qëndrimin e LSDM-së, por vetëm u thirr në komunikatën e djeshme të përbashkët të BE-së dhe SHBA-ve, duke thënë se nga afër ndjek zhvillimet e situatës zgjedhore në vend.