Migrimi, ekspertët: Ballkani po ndjen efektet nga ”ikja e trurit”

Kështu vlerësuan studiues nga vendi dhe rajoni në konferencën e katërt ndërkombëtare të organizuar nga  Universiteti i Tetovës dhe Universiteti “Haxhi Zeka” nga Peja.

 

“Një dukuri e fundit është e ashtuquajtura “ikje e trurit”, që nënkupton se kuadrot me përgatitje të larta shkollore, si mjekë, inxhinierë, programues dhe specialistë të fushave tjera për çdo ditë bëjnë braktisjen e shteti të tyre. Nëse vazhdon ky ritëm, gjitha shtetet në Ballkanin Perëndimor si dhe Maqedonia do të ndeshen me mungesë të fuqisë punëtore”,- deklaroi koordinatori i projektit, Etem Iseni.

 

“Të gjitha vendet evropiane do të ballafaqohen me trend të ngjashëm demografik në të ardhmen e afërt. Si faktor tjetër vlen të theksohet e dhe niveli i zhvillimit ekonomik i vendit dhe i rajonit”,- tha dekani i Fakultetit Ekonomik në UT, Raman Ismaili.

 

Rektori i Universitet “Haxhi Zeka” tha se konferencat shkencore kanë rëndësi të madhe për universitetet dhe studiuesit.

 

“Shkëmbehen mendimet, shkëmbehen idetë, njoftohen shkencëtarët njëri me tjetrin, shkëmbejmë literaturën dhe çdo njëri e sheh veten ku  është dhe çka duhet të bëjë”,- u shpreh rektori i Universitetit “Haxhi Zeka”-Pejë, Fadil Millaku.

 

Në fund të konferencës u promovua edhe revista ekonomike “Vizioni ekonomik”, e cila përmbledh punimet shkencore nga konferencat e kaluara.