Zgjedhjet e parakohshme parlamentare, BEJLI: Zgjedhje të qeta, me disa parregullsi

Ambasadori amerikan, Xhes Bejli, tha se zgjedhjet janë mbajtur në atmosferë të qetë, me vetëm disa parregullsi procedurale. 

 

“Shtetet e Bashkuara të Amerikës i përshëndesin të gjithë qytetarët të cilët e kanë realizuar të drejtën e tyre të votës dhe kanë votuar më 11 dhjetor. Përshëndetëm edhe vlerësimin preliminar të OSBE-ODIHR-it se zgjedhjet ishin kompetitive dhe se ishin respektuar të drejtat fondamentale. Jehona e votuesve ishte në nivel, ndërsa zgjedhjet u realizuan në mënyrë të qetë, të shoqëruara nga disa parregullsi procedurale. Shprehim brengosjen e ekipit monitorues të Ambasadës amerikane për përgatitjen administrative të zgjedhjeve dhe i bëjmë thirrje qeverisë së ardhshme të vazhdojë të punojë në ndërtimin e kapaciteteve të KShZ-së për t’i zgjidhur kontestet dhe çështjet strukturore dhe juridike që kanë të bëjnë me listën zgjedhore”,- deklaroi ambasadori i ShBA-ve në Maqedoni, Xhes Bejli.

 

Ambasadori Bejli gjithashtu tha se zgjedhjet e 11 dhjetorit ishin një hap i rëndësishëm për daljen e Maqedonisë nga kriza politike. 

 

“I inkurajojmë partitë që do ta formojnë qeverinë e ardhshme të kenë një bashkëpunim konstruktiv me opozitën, me qëllim të realizimit të reformave që mundësojnë vazhdimin e procesit eurointegrues, me theks të sundimit të së drejtës”,- tha ambasadori i ShBA-ve në Maqedoni, Xhes Bejli.

 

SHBA-të, shtoi ambasadori amerikan, Xhes Bejli, si dhe përfaqësueset e tjera të Bashkësisë Ndërkombëtare, mbeten partnerë të Maqedonisë, me qëllim të realizimit të prioriteteve. Bejli nuk deshi të komentojë rezultatet e zgjedhjeve pa u prononcuar fillimisht KShZ-ja, e cila duhet t’i tregojë rezultatet preliminare.