Rregulla më të mira të biznesit, tre odat ekonomike me projekt të përbashkët

Shpesh ndërrohen, nuk janë të kuptueshme dhe për shkak të kësaj vështirë mund të përcillen, thonë ekspertët.

 

Për këtë qëllim, Oda Ekonomike e Maqedonisë, Oda Ekonomike e Maqedoninë Veriperëndimore dhe Oda Ekonomike për Teknologji Informatike dhe Komunikuese, përmes një projekti katërvjeçar, të mbështetur nga USAID, kërkojnë miratimin e rregullores më të mirë të biznesit, si mbështetje e ndërmarrjeve të vogla dhe të mesme për implementim më të lehtë të ligjeve dhe përforcim të dialogut publik-privat.

 

“Në vitin 2015, Kuvendi mori 541 ligje, nga të cilat 57 për qind brenda natës, pa konsultime publike. Edhe pse kjo ka qenë në drejtim të përmirësimit të rregullores, megjithatë, u tregua si sfidë e madhe për bizneset, që orvatjet e tyre të përshtaten drejt ndryshimeve të bëra”,- theksoi drejtori i Misionit të USAID-it në Maqedoni, Xhejms Stain.

 

“Kjo është hera e parë që tre odat ekonomike në Maqedoni të bashkohen për të zbatuar një projekt që synon përmirësimin e rregullativës afariste. Kjo sinergji paraqet një precedent të mirë, sepse zëri i bizneseve tona do të jetë “më i zëshëm” dhe përfshirja e komunitetit të biznesit më e gjerë”,- theksoi drejtori ekzekutiv i OEMVP-së, Fatmir Bytyqi.

 

“Ne, si odë ekonomike, jemi të gatshëm ta implementojmë të gjithë atë që është e rëndësishme për anëtarët tanë. Do të mundësojmë implementim të suksesshëm të projektit edhe tek kompanitë jashtë Shkupit si dhe kyçjen e tyre në rrjetin e odave regjionale”,- theksoi drejtori ekzekutiv i Odës Ekonomike të Maqedonisë, Milevska Shtrbevska.

 

Që bizneset të kenë sukses është e nevojshme të ketë konsultime të përhershme dhe transparente mes institucioneve shtetërore dhe biznesit, sepse kështu do të aprovohet rregullore më e mirë, më lehtë e kuptueshme për kompanitë dhe më e thjeshtë për zbatim. Projekti “Partneritet për rregullore më të mirë të biznesit” ka vlerë prej 1,9 milionë dollarëve. (Gamzmend Kurtishi, TVM2)