Avancon Brooklyn, do të përballet me Miamin

Ka marrë fund në raundin e parë të perfundimtares historia e hirushes për Toronto Raptors, që u menjanua pas humbjes 104-103 përballë Brooklyn Nets në takimin e shtatë në Ligën amerikane të basketbollit.

Në fillim të kampionatit, vetëm ndonjë tifoz i çmendur do të vinte bast se skuadra e udhëhequr nga Dwane Casey do të kalonte në perfundimtare, pasi një gjë e tillë nuk ndodhte prej 6 stinorësh për Raptors, por mesa duket 7 lëvizje lojtarësh gjatë dhjetorit të kaluar, ndryshuan deri në themel balancën e një ekipi që u ringrit edhe më i fuqishëm pas këtij mini revolucioni.

Në sfidën përcaktuese të Torontos, vendasit nga disavantazhi barazuan në periudhën e parë me atë të Amir Johnson, për ta mbyllur këtë pjesë të lojës vetëm 3 pikë përpara Brooklyn Nets.

Në të dytën dhe në të tretën, skuadra njujorkeze jo vetëm që i parakaloi të zotët e shtëpisë, por vazhdoi lojën me qetësi duke thelluar avantazhin. Spektakli i vërtetë mes Brooklyn Nets dhe të furishmëve Toronto Raptors në “Air Canada Centre” duket se është rezervuar për në minutat e fundit, të cilat janë vendimtare sepse një skuadër duhet të largohet dhe tjetra duhet të vazhdojë rrugëtimin.

Kanadezët me mish e me shpirt luftojnë të padorëzuar, duke iu kundërpërgjur pikëve të kundërshtarit me të njëjtën monedhë, madje i afrohen aq shumë por sirena sinjalizon fundin e takimit dhe është Brooklyn Nets që ka prerë biletën për në raundin e dytë të perfundimtares në Konferencën e Lindjes, ku gjen Miami Heat, kampionët e dy stinoreve të fundit në NBA.