Alepo, OKB: Janë evakuuar reth 20 mijë civilë; Turqia flet për reth 38 mijë të evakuuar

Në operacione paralele evakuimi, 750 vetë janë nxjerrë nga dy fshatrat e rrethuar sirianë Al Fuah dhe Kefraya.

 

Sidoqoftë, Kombet e Bashkuara nuk mund të konfirmojnë sesa njerëz vazhdojnë të mbeten të bllokuar në enklavën që vazhdon të jetë nën kontrollin e rebelëve.

 

Këshilli i Sigurimit ka kërkuar monitorimin e procesit dhe sigurisë së civilëve që mbeten të bllokuar.

 

Qeveria siriane ka autorizuar dërgimin e një misioni prej 20 personash në Alepon lindore, për të monitoruar evakuimet.

 

Stafi shtesë i OKB-së ndodhet në Damask, i gatshëm për të udhëtuar drejt Alepos lindore sa më shpejt që të jetë e mundur.

 

Por, ndërsa OKB-ja flet për afro 20 mijë të evakuuar, Turqia ka deklaruar se operacioni për evakuimin e civilëve dhe luftëtarëve nga Alepoja lindore ka nxjerrë që andej 37.500 vetë.

 

Ndërsa sipas Kryqit të Kuq, numri i të evakuuarve është 25 mijë. Burime nga rebelët sirianë thonë se, edhe pas largimit të mijëra vetëve nga Alepoja lindore, vetëm rreth gjysma e civilëve që donin të largoheshin e kanë bërë këtë. Luftëtarët rebelë, ndërkohë, do të largohen vetëm pasi të gjithë civilët që duan do të jenë larguar.