Qeveria e re as në horizont, Gruevski zbut retorikën ndaj shqiptarëve

Në intervistë për portalin “republika.mk”, Gruevski thotë se VMRO-DPMNE nuk është parti shoviniste, ndërsa ai vetë nuk është nacionalist dhe nuk punon kundër shqiptarëve.

 

Sipas tij, shqiptarët kanë qenë të shtypur në kohën e LSDM-së, pasi atëherë janë burgosur dhe diskriminuar, ndërkaq VMRO dhe ai vetë po bëjnë të kundërtën.

 

Mirëpo, siç duket, ky konvertim nuk i ka ndihmuar që të afrojë subjektet politike shqiptare për fillimin e negociatave për formimin e shumicës parlamentare dhe qeverisë. Përderisa BDI nuk sqaron për TVM2 nëse ka gjetur gjuhën e kompromisit me VMRO-në për të vazhduar bashkëqeverisjen, BESA dhe LR-PDSh thonë se nuk po zhvillojnë bisedime me asnjërën palë. 

 

“Hëpërhë nuk kemi bisedime me asnjërën parti” - thotë Zeqiria Ibrahimi nga Lëvizja BESA. 

 

Ndërkaq, Arben Travari nga Lëvizja për reforma në PDSh thotë se ideja e kësaj partie ka qenë që të unifikojë kushtet e partive shqiptare kundrejt atyre maqedonase, për të shfrytëzuar në maksimum momentin e krijuar politik nga barazia e forcës politike mes VMRO-DPMNE-së dhe LSDM-së. 

 

LSDM vazhdon të deklarojë se qeverinë e re do ta bëjë pikërisht koalicioni që kryeson kjo parti. Në kumtesën lidhur me intervistën e Gruevskit, LSDM thotë se jo një intervistë, por edhe intervistë me 100 vazhdime nuk mund ta ndryshojnë bindjen e qytetarëve për të.

 

 

Për sa kohë partitë politike nuk po gjejnë gjuhën për të krijuar shumicën e re parlamentare, nga e cila do të buronte edhe qeveria e re, vazhdon qeverisja e qeverisë me kompetenca teknike mes koalicionit VMRO–BDI.