Haradinaj para gjykatës, Kosova pret lirimin e tij

Ky trup gjykues francez pritet të vendosë nëse kreu i AAK-së do të ekstradohet në Serbi, siç kërkohet në urdhër-arrestin e lëshuar nga Beogradi ndaj tij, apo do të lihet i lirë.

 

Avokati i Haradinajt, Arianit Koci, ka thënë se gjasat janë zero që Haradinaj të ekstradohet në Serbi. Kjo është luftë speciale e Serbisë ndaj Haradinajt, si drejtues i UÇK-së në Zonën e Dukagjinit”,- ka thënë avokati Koci. 

 

Ramush Haradinaj u arrestua të mërkurën nga autoritetet franceze në bazë të një fletë-arresti të lëshuar nga Serbia. Haradinaj kishte me vete një pasaportë diplomatike gjatë kohës që u arrestua nga policia kufitare franceze.

 

Serbia ka ngritur 108 padi penale kundër tij, për shkak të dyshimit se ka kryer krime të rënda, duke përfshirë terrorizmin dhe vrasjen e civilëve në Kosovë në vitin 1998 dhe 1999.

 

Autoritetet e Serbisë kërkojnë ekstradimin e Haradinajt në Serbi. Autoritetet më të larta të Kosovës e kanë quajtur të paligjshëm ndalimin e tij, si dhe kanë kërkuar menjëherë lirimin. 

 

Haradinaj para dy viteve ishte arrestuar edhe nga autoritetet sllovene në bazë të një fletë-arresti nga Serbia, por është liruar me vendim të Gjykatës.