Protestë në Francë për lirimin e Haradinajt

Protesta është organizuar nga shqiptarët që jetojnë dhe veprojnë në Francë, përkrahur edhe nga Shoqata “Lëvizja”. Pjesëmarrësit kanë ftuar t’iu bashkohen edhe shqiptarët e ndodhur në Zvicër e Gjermani si dhe vende të tjera të Europës.

 

Protestuesit gjithashtu kërkojnë lirimin sa më të shpejtë të Haradinajt dhe hedhjen poshtë të të gjitha fletë-arresteve që datojnë nga regjimi i Millosheviqit.

 

Ramush Haradinaj është arrestuar në Francë që nga e mërkura. Ndërkohë, Kongresmeni amerikan Eliot Engel e cilëson të papranueshëm ndalimin e liderit të Aleancës për Ardhmërinë e Kosovës, Ramush Haradinaj. Ai deklaroi se Franca duhet ta lirojë ish-kreun e UÇK-së sa më shpejt që të jetë e mundur, ndërsa Serbisë i bëri thirrje që të mos abuzojë me Interpolin.

 

Kjo situatë nuk ka të bëjë aspak me sundimin e ligjit apo drejtësinë, arsyeton kongresmeni. Gjykatat ndërkombëtare e kanë liruar Haradinajn dy herë, çka duhet të jetë e mjaftueshme për të dëshmuar se çdo akuzë tjetër tashmë nuk ka asnjë vlerë.