“Lagja e trimave”, edhe sot gjykim me dyer të mbyllura; PPS: Ndryshime në Ligjin për mbrojtjen e dëshmitarëve

Trupi gjykues ka prezantuar provat materiale, gjegjësisht bisedat e përgjuara mes pjesëtarëve të “Grupit të Kumanovës”.

 

“Ende vazhdojnë dëshmitë e koduara. Seanca shkoi në rregull, nuk pati ankesë prej të akuzuarve për maltretime. E vazhdojmë më datën 14 seancën e radhës”,- deklaroi avokati i mbrojtjes, Mefail Asllani.

 

Ndërkohë, ende nuk dihet se kur do të merret për shqyrtim nga Prokuroria Publike Speciale lënda gjyqësore për “Lagjen e trimave”, por as edhe lëndët e tjera si “Sopoti” dhe “Monstra”.

 

Nga Prokuroria Speciale në një prononcim për gazetën “Koha” thonë se këto lëndë nuk mund të proceduohen nga PPS pa u bërë paraprakisht ndryshimet e kërkuara në Ligjin për mbrojtjen e dëshmitarëve.

 

“Ne jemi të vetëdijshëm për interesin e lartë që opinioni ka për këto  raste. Megjithatë, potencojmë se nuk ka asnjë risi në këtë drejtim, në veçanti për rastin “ Lagja e Trimave”. Theksojmë se ndryshimet në Ligjin për mbrojtjen e dëshmitarëve janë thelbësore për punën tonë të mëtejmë”,- thonë nga Prokuroria Speciale Publike.  

 

Edhe avokati i mbrojtjes në lëndën “Lagja e Trimave”, Mefail Asllani,  thotë se kanë kërkuar nga Prokuroria Speciale të merret me këtë lëndë, por akoma nuk kanë përgjigje.