Japoni, stuhi dëbore, bllokohet veriu i vendit; Britani, era arrin shpejtësinë 125 km në orë; Australi, temperatura 40 gradë, ulet në 27 vetëm gjatë natës

Në prefekturën Hokaiku era që arriti shpejtësinë 126 km në orë, nuk lejon ekipet të pastrojnë rrugët nga bora dhe akulli. Rajoni ka 24 orë i bllokuar dhe banorët janë edhe pa energji elektrike. Autoritetet i lajmërojnë qytetarët të mos dalin në rrugë pa nevojë, pasi në zonat malore parashikohen edhe ortekë. 

 

Edhe Britania ka probleme me erën e fuqishme që në disa zona arriti shpejtësinë 125 kilometra në orë. Mijëra banesa kanë mbetur pa energji elektrike, shumë fluturime ajrore janë anuluar. Pemë të rrëzuara mbi automjete e mure të shembura, kjo është tabloja e krijuar nga era. Një urë pranë Edinburgut është mbyllur pasi një kamion u aksidentua si pasojë e stuhisë së fuqishme. Era e fortë ka shkaktuar dëme të shumta, por fatmirësisht deri tani nuk ka persona të lënduar. 

 

Por, derisa hemisfera veriore po vuan nga temperaturat e ulëta dhe stuhitë e dëborës, në Australi të gjithë po ankohen nga vapa. Në Sidnej termometri shënon 40 gradë celsius dhe të gjithë u janë drejtuar plazheve. Edhe gjatë natës, termometri nuk bie nën 27 gradë, duke shënuar netët më të nxehta që nga viti 1968. Përveç temperaturave të larta, vazhdon edhe thatësira e zgjatur që është shoqëruar me zjarre.