Qeveria e re, afatet rrjedhin, mandatari numëron në vend

Nga partia e Gruevskit nuk konfirmojnë as fillimin e negociatave sipas parimit të promovuar deri tani, negociata mes dy partive fituese.

 

Pavarësisht deklarimit të VMRO-së se bisedimet duhet të zhvillohen mes koalicionit të kryesuar nga kjo parti dhe BDI-së në palën shqiptare, por edhe deklarimit të BDI-së se negociatat fillimisht do t’i nis me VMRO-në, një zhvillimi i tillë ende nuk është konfirmuar për opinionin. Edhe burime brenda BDI-së konfirmojnë se nuk ka ftesë zyrtare nga mandatari për fillimin e negociatave. 

 

Pengesë për fillimin e bisedimeve sipas parimit qeveri mes fituesve për VMRO-DPMNE-në u bë fillimisht Deklarata e përbashkët e partive shqiptare dhe qëndrimi i fundit i BDI-së se çështja e zyrtarizimit të gjuhës shqipe, PPS-ja dhe eurointegrimi janë çështje të panegociueshme të cilat mandatari duhet t’i pranojë “en bloc”. Menjëherë pas publikimit të këtyre dy qëndrimeve, VMRO-DPMNE i hodhi poshtë si të papranueshme.    

 

Ndërkaq, LSDM, e cila në vazhdimi pretendon se është ajo që do të bëjë qeverinë e re, ende nuk është prononcuar qartë nëse ka gatishmërinë të pranojë kushtin e BDI-së për tre çështjet e panegociueshme dhe kërkesat e subjekteve shqiptare të shënuara në Deklaratën e përbashkët. 

 

Në ndërkohë, një grup intelektualësh shqiptarë u kanë bërë thirrje subjekteve shqiptare që gjatë procesit të zhvillimit të bisedimeve me partitë që marrin mandatin të kenë parasysh faktin që VMRO-DPMNE akoma udhëhiqet nga persona që kanë përgjegjësi për gjendjen katastrofale dhe për të cilët ka dyshime serioze për përfshirjen e tyre në megaskandale, shkatërrimin e institucioneve, shembjen e proceseve euroatlantike dhe shkeljen mbi dinjitetin njerëzor. 

 

Sipas tyre, pjesa dërmuese e votuesve në mbarë shtetin janë përcaktuar për ndryshime, kurse në segmentin shqiptar ka dyfish më tepër votues që kanë votuar për ndryshime nga ata që kanë përkrahur gjendjen ekzistuese.