Turqi, arrestohet terroristi i masakrës së Stambollit

Ai është uzbeku, Abdulkadir Masharipov. Bashkë me të u prangosën edhe pesë persona të tjerë. Masharipov, i cili nga bashkëluftëtarët e tij njihet me emrin Abu Mohammed Khurasani, u ndalua në një banesë në Stamboll, ku jetonte bashkë me djalin e tij 4-vjeçar, një shtetas tjetër nga Kirgistani dhe tre gra.

 

Guvernatori i Stambollit tha se ai ishte trajnuar në Afganistan. Masharipov pritet të merret në pyetje, ndërsa autoritetet thanë se shenjat e gishtërinjve të gjetura në vendin e ngjarjes janë të 34–vjeçarit.

 

Që të gjithë të arrestuarit, nga Uzbekistani, Kirgistani, Somalia, Egjipti dhe Senegali dyshohet se janë pjesë e një celule të ISIS-it që strehohej në periferitë e pjesës europiane të Stambollit.

 

Të gjitha forcat turke të sigurisë ishin angazhuar prej javësh për kapjen e terroristit. Mediat turke thonë se Abdulkadir Mashirapov ishte një militant i “Shtetit Islamik” dhe një vrasës gjakftohtë. Disa orë pas masakrës, grupi terrorist mori përsipër sulmin, duke thënë së kjo ishte një kundërpërgjigje për rolin e Turqisë në aleancën ushtarake për mposhtjen e terroristëve. 

 

Terroristi uzbek kishte mbërritur në Stamboll rreth dy javë para sulmit nga një provincë e Konias. Ai ishte pjesë e një celule të ISIS në Konia, nga e cila kishte marrë mbështetje të vazhdueshme. 

 

Gjatë sulmit në lokalin e natës “Reina” në Stamboll humbën jetën 39 persona dhe u plagosën dhjetëra të tjerë. Sulmi u mor përsipër menjëherë nga ISIS, që e interpretoi atë si hakmarrje për përfshirjen ushtarake të Turqisë në Siri.