Strehimoret e të pastrehëve, do të zgjerohet kapaciteti në “Munin Potok”

Qendrat funksionojnë pa ndërprerje 24 orë në ditë dhe ka edhe ekipe mobile të Kryqit të Kuq që marrin nga rrugët të pastrehët.

 

“Numri i të pastrehëve në qytetin e Shkupit është 170, ndërsa jashtë Shkupit janë 10 persona, pra ky është një numër i vogël… Ne nuk dëshirojmë që të pastrehët të jenë të varur nga kjo strehimore, prandaj në të shumtën e rasteve u gjejmë edhe vende pune që më pas t’i rikthehen përditshmërisë”,- thanë nga Kryqi i Kuq.

 

Të pastrehët janë falënderues për këtë zgjidhje momentale, pasi dimri për ta është periudha më e vështirë e vitit.

 

“Tani për tani këtu është shumë mirë. Nuk punoj asgjë, flejë rrugëve. Erdha në këtë gjendje sepse nëna imë e shiti banesën ku jetonim. Më herët kam punuar si teneqexhi, por tani nuk kam asgjë për të filluar punë prapë. Më të vështirë e kam periudhën e dimrit, sepse temperaturat e ulëta janë të papërballueshme. Për ushqim nuk e kam problem, gjejmë ndonjë kore bukë nëpër kontejnerë”,- deklaroi një i pastrehë.

 

Qyteti i Shkupit ndërpreu festimet e zakonshme të Vitit të Ri me qëllimin që paratë t’u ndahen atyre që kanë nevojë.

 

Paratë e kremtimeve festive do të dedikohen për zgjerim të kapacitetit pranues të qendrës në “Momin Potok”. 

 

“Qyteti i Shkupit është tërhequr nga kremtimet e Vitit të Ri, sepse të hollat e parapara për festat e fundvitit  do t’u dedikohen skamnorëve. Kryqi i Kuq na ka ofruar projekt që kjo pikë të zgjerohet me kabina dushi dhe tualete shtesë.  Aktualisht këtu meshkujt edhe femrat flenë në të njëjtat dhoma. Me 2 milion denarë që ne i kemi ndarë, do të mundësohen dhoma të ndara për ta”,- u shpreh kryetari i Qytetit të Shkupi, Koce Trajanovski.

 

Të pastrehët sot morën edhe pako ndihma nga Qyteti i Shkupit.

 

Por, padyshim, më shumë se ushqimet, ishin këpucët dhe rrobat e ngrohta ato që i gëzuan më shumë.