Garet: Partitë punojnë në formimin e qeverisë; Meta: Situata në Maqedoni, shqetësuese

Ambasadori britanik në Maqedoni, Çarls Garet, duke komentuar aktualitetet politike në vend, ka thënë se partitë po punojnë në formimin e qeverisë dhe po shqyrtohen të gjitha mundësitë. Sipas Garet, shumëçka varet nga takimet dhe bisedat vijuese të cilat janë duke u realizuar me shpresën se qeveria e re do të vazhdojë reformat.

 

"Ne jemi në një situatë ku janë duke u zhvilluar një numër i madh i bisedimeve për momentin për formimin e qeverisë së re. Situata është e pazgjidhur, ne i kemi rezultatet e zgjedhjeve të dhjetorit. Ajo që është e rëndësishme tani është që të gjitha partitë politike të bëjnë çmos të formojnë qeverinë e cila do t’i realizonte reformat për të cilat ne shpresojmë”,- deklaroi ambasadori i Britanisë së Madhe, Çarls Garet.

 

Edhe Brukseli zyrtar ka kundërshtuar zgjedhjet e reja në vend. Eurodeputeti dhe njëkohësisht raportuesi për progresin e Maqedonisë, Ivo Vajgëll, është shprehur se zgjedhjet e reja kërcënojnë thellimin e krizës dhe destabilizimin e vendit. Shqetësimin e tyre për situatën në Maqedoni e ka shprehur edhe Tirana zyrtare.

 

Kryeparlamentari, Ilir Meta, thotë se pozitive si për Maqedoninë edhe për rajonin është pranimi i zgjedhjeve dhe moskontestimi i institucioneve. Ndërkohë, sipas Metës, vetëm stabiliteti i Maqedonisë dhe të drejtat e shqiptarëve mund t’i kontribuojnë proceseve.

 

“Maqedonia është nyja më delikate e rajonit tonë… Për fat të mirë, zgjedhjet e fundit u pranuan nga të gjitha forcat politike dhe kjo është gjë pozitive për Maqedoninë, është pozitive për ne dhe për të gjithë rajonin tonë në mënyrë që të mbyllet periudha e kontestimit të zgjedhjeve dhe institucioneve. Janë dy elemente shumë të rëndësishme që mund të shkojnë përpara vetëm në mënyrë paralele: stabiliteti i Maqedonisë dhe të drejtat e shqiptarëve, dhe roli i shqiptarëve si faktor jo vetëm për stabilitetin, por edhe për integrimin europian dhe euroatlantik të këtij vendi fqinj tepër të rëndësishëm për ne dhe për të gjithë rajonin tonë”,- theksoi kryeparlamentari i Shqipërisë, Ilir Meta. 

         

Një ditë më parë, edhe Komisioni Europian porositi presidentin Ivanov që sa më shpejtë të përcaktojë mandatar të ri për formimin e një qeverie stabile, e cila duhet të jetë e gjerë dhe të mbështetet me konsensus të fuqishëm reformues dhe bashkëpunim ndëretnik.