Gjermani, 1 mijë policë në aksionin anti-terror, katër në pranga

Policia gjermane ka zhvilluar gjatë orëve të fundit një mega-operacion kundër grupeve terroriste të lidhura me “Shtetin Islamik”. Në pranga kanë rënë katër persona.

Mega-operacioni u përqendrua në Frankfurt, ku në orët e para të mëngjesit të së mërkurës u arrestua një 36-vjeçar tunizian.

Dyshohet se ai kishte një rol të rëndësishëm në rekrutimin e militantëve dhe dërgimin e tyre në Siri e Irak për llogari të “Shtetit Islamik”.

Mbi 1 mijë forca policie u angazhuan në shtetin federal të Hesenit, ku u kontrolluan 54 objekte, mes të cilave xhami, apartamente e ndërmarrje të lidhura me aktivitete terroriste. Ndërsa mbrëmjen e të martës, tre të dyshuar po për rekrutim të terroristëve u arrestuan gjatë operacioneve të zhvilluara në Berlin.

Në kërkim janë edhe 16 persona të tjerë të moshave nga 16 deri në 46 vjeç.