Takimi në Bruksel, Mogerini lavdëron liderët e Kosovës dhe Serbisë

Mogerini, e cila në fillim i priti në takime të ndara Hashim Thaçin dhe Isa Mustafën, dhe më pas Tomisllav Nikoliç dhe Aleksander Vuçiç, i bëri ata bashkë në një darkë pune, me qëllim normalizimin e marrëdhënieve mes Beogradit dhe Prishtinës.  

 

Përfaqësuesja e lartë e Bashkimit Europian tha se është e inkurajuar nga angazhimi konstruktiv i treguar nga të dyja palët.

 

“Ky angazhim dhe vullnet politik i kontribuon shumë reduktimit të tensioneve dhe ne do të vazhdojmë të punojmë në këtë frymë”,- tha  Mogherini.

 

Sipas saj, dialogu Prishtinë-Beograd është i rëndësishëm edhe për rajonin edhe për Bashkimin Europian.

 

“Përparimi në normalizimin e marrëdhënieve është kyç për të dyja palët për paqen dhe ecjen drejt Bashkimit Europian”,- shtoi ajo.

 

Liderët kosovarë dhe ata serbë, ndryshe nga takimi i 24 janarit, nuk komentuan pas takimit në Bruksel. Bisedimet e së mërkurës u përqendruan tek çështja e drejtësisë në veri, energjetika dhe krijimi i Asociacionit të komunave me shumicë serbe.

 

Nuk u bë e ditur nëse është folur për prishjen e murit ilegal të ndërtuar nga serbët, prishjen e të cilit e kërkon rezoluta e Kuvendit të Kosovës, e cila kërkonte që pushteti lokal i Mitrovicës veriore të rrënonte murin brenda muajit janar.