Botë
Kolonitë izraelite, ShBA: Mund të mos jenë të dobishme për paqen
03.02.2017 13:49
Ndërtimi i kolonive të reja izraelite mund të mos jetë i dobishëm për arritjen e paqes me palestinezët...
Shtëpia e Bardhë i ka hedhur poshtë sinjalet e mëparshme të presidentit, Donald Trump, se ai nuk ishte kundër ndërtimeve të reja.
Megjithatë, sipas Administratës amerikane, presidenti nuk i sheh kolonitë si një pengesë serioze për paqen. Fati i këtyre kolonive në bregun e pushtuar perëndimor është një prej çështjeve më të nxehta, për të mos thënë kryesorja mes Izraelit dhe palestinezëve.
Më shumë se 600 mijë hebrenj jetojnë në 140 koloni të ndërtuar që prej vitit 1967, kur Izraeli pushtoi Bregun Perëndimor dhe Jerusalemin Lindor. Qeveria izraelite, e cila kishte diferenca të thella me administratën “Obama”, për këtë çështje u ndje më e fortë me ardhjen e Trumpit në pushtet dhe lajmëroi ndërtimin e mijëra shtëpive të reja.
Shtëpia e Bardhë në një komunikatë mjaft diplomatike tha se nuk beson se ekzistenca e kolonive pengon paqen, por shtoi se është e mendimit se ndërtimi i shtëpive të reja, apo zgjerimi i kolonive aktuale mund të mos jetë i dobishëm për paqen. Sipas Shtëpisë së Bardhë, kjo çështje do të diskutohet mes Trumpit dhe Netanjahut, kur kryeministri izraelit të vizitojë Uashingtonin muajin e ardhshëm.
BELINDA KOKA-ADEMI