Ademi: Mjedisi jetësor i rëndësishëm në konkurrencë

Si vend kandidat, Maqedonia i përkrah dhe i implementon politikat dhe direktivat e BE-së që kanë të bëjnë me ndryshimet klimatike dhe ambientin jetësor.

 

Kështu ka deklaruar ministri i Ambientit, Abdylhaqim Ademi, në konferencën joformale të ministrave të ambientit të vendeve të  Bashkimit Evropian dhe të vendeve aspirante, të  organizuar nga Greqia, si vend kryesues me BE-në. Për dallim nga disa vende të tjera, Maqedonia ka miratuar edhe raportin e tretë për ndryshimet klimatike.

 

Adresimi i drejtë i çështjeve klimatike kërkon qasje dhe teknologji inovative ekologjike. Eko-risitë do të bëhen kyçe për rritjen ekonomike, konkurrencën dhe punësimin, ka thënë Ademi në Athinë.

 

“Ne vazhdojmë me implementimin e politikave të ambientit jetësor. Jemi në komunikim të vazhdueshëm me delegacionin e BE-së në Maqedoni, por edhe me resorë të tjerë, me qëllim që politikat e ambientit jetësor të implementohen edhe në sfera tjera, e veçanërisht tani kur flitet shumë për ndryshimet klimatike, të cilat në njëfarë mënyrë japin rezultate negative”, deklaroi ministri  i Ambientit Jetësor, Abdylaqim Ademi.

 

Ministri Ademi gjithashtu ka njoftuar se kanë filluar aktivitetet konkrete në kuadër të projektit, i cili po mbështetet  nga USAID-i në 17 kompani në Maqedoni, me qëllim që të vendosen sisteme për monitorimin e shpenzimit të energjisë, ndërsa në 6 kompani do të mbështetet realizimi i projekteve për efikasitet energjetik.

 

Takimi i sotëm i ministrave të Ambientit, shërbeu si parapërgatitje e samitit për ndryshime klimatike, i cili do të mbahet në muajin qershor në qytetin e Bonit të Gjermanisë, ku do të diskutohet për kornizën politike evropiane për klimë dhe energji 2030.