Ivanov i ankohet komisionerit Han: Dënoni publikisht përzierjen e fqinjëve në RM, Ambasadori rus: Shtetet fqinje mos të përzihen në Maqedoni

Presidenti Ivanov ka shfrytëzuar takimin me eurokomisionerin Han që të ankohet edhe për një tjetër fakt.

“Presidenti Ivanov ka shfaqur pakënaqësi nga mungesa e dënimit publik të përzierjes në punët e brendshme të Republikës së Maqedonisë nga ana e disa vendeve fqinje”,- thuhet në njoftimin e Presidencës.

Ivanov edhe një herë ka theksuar se tensionet në marrëdhëniet ndëretnike janë pasojë e gjendjes së stërzgjatur status-kuo në Republikën e Maqedonisë.

Të njëjtin shqetësim si Ivanov e ka shprehur edhe ambasadori rus në Maqedoni, Oleg Nikolaevich Shcherbak. Moska zyrtare është e shqetësuar për përzierjen e shteteve fqinje në Maqedoni.

“Një ndër parimet e të drejtës ndërkombëtare është që shtetet të mos përzihen në politikat e brendshme të shteteve tjera. Maqedonia tani duhet të ketë një politikë dhe Qeveri stabile dhe për këtë është e pëlqyeshme që shtetet fqinje të mos fusin duart për të ngatërruar ecjen e punëve në Maqedoni”,- ka deklaruar Shcherbak.