Osmani: Draft-ligji për gjuhën, nuk ndryshon

20.02.2017 16:30

BDI dhe LSDM vazhdojnë me konsultat brendapartiake...

BDI dhe LSDM vazhdojnë me konsultat brendapartiake pa zbuluar detaje lidhur me rrjedhën e negociatave për arritjen e ndonjë marrëveshjeje të mundshme për krijimin e shumicës së re. Nga selia blu thonë se nuk lëshojnë nga versioni i propozuar për sa i përket përdorimit të gjuhës shqipe.
 
“BDI në koordinim me partitë e tjera shqiptare ka përpiluar një draft ligj për gjuhën shqipe dhe që është optimumi që zgjedh çështjen e gjuhës shqipe apo që mbyll këtë temë nga marrëveshja e Ohrit. Teksti i ligjit nuk është çështje e negociueshme. Grupet e punës nuk negociojnë mbi tekstin e ligjit sepse ai është i panegociueshëm , por negociohet a është i pranueshëm apo jo. Mendime jepen por drafti i ligjit do mbetet i pa prekur”, tha zëdhënësi I BDI-së Bujar Osmani.
 

“Aleanca për shqiptarët” pret takim me LSDM-në për të sqaruar qëndrimet

Nga “Aleanca për shqiptarët” thonë se brenda javës do të ketë një takim me përfaqësues të LSDM-në për të sqaruar më konkretisht me ta se cilat janë vijat  e kuqe të dy partive, në mënyrë që më pas Aleanca të vendosë nëse do t’ia japë apo jo nënshkrimet Zaevit. Nga Aleanca mbeten në qëndrimin se duhet zbatuar në përpikëri gjithçka që gjendet në deklaratën e nënshkruar nga tre partitë parlamentare shqiptare. Aleanca e llogarit tryezën e  liderëve si projekt kombëtar.

Lëvizja “Besa”: Jo në një tryezë me kryefajtorët për këtë gjendje

Por, qëndrim ndryshe rreth deklaratës dhe tryezës ka Lëvizja “Besa”. Për partinë e Kasamit, tryeza nuk është konstituuar.

“E vërteta është se, në relacion me tryezën e partive parlamentare shqiptare në Maqedoni, qëndrimi i Lëvizjes BESA ka qenë se nuk pranon takim që iniciohet me ftesë të kryetarit të BDI-së në Shkup dhe kjo ka qenë e njohur për opinionin. Ai që ishte fajtori kryesor që BESËS iu morën dy deputetë për t’iu dhënë VMRO-së dhe i cili për 15 vjet e nëpërkëmbi interesin shqiptar, për çka flet edhe përmbajtja e Deklaratës (që erdhi vetëm pas paraqitjes së BESËS në skenë), dhe ai që nuk ka më legjitimet të përfaqësimit të shqiptarëve, nuk është i denjë as të ftojë takim të partive shqiptare në Maqedoni. Ai mund të jetë kryeplak për ndonjë parti a aleancë tjetër, por për ne ai është kryefajtori i gjendjes së shqiptarëve në Maqedoni”,- thonë nga Lëvizja “Besa”.

Ndërkohë, që pas dështimit të Gruevskit për të formuar qeverinë, nga partia e tij vijojnë të kërkojnë zgjedhje të reja, për çka numri më i madh i partive në vend dhe bashkësia ndërkombëtare janë shprehur kundër. (Naim Ramadani, TVM2)